八號風球~風狂shopping

八號風球~風狂shopping

上一次個三號風球仲勁過今日個風，但係上一次個市升緊又點可以打八號風球丫... 但今日唔提早打八號風球，又點可以停左個市? 但係為左個市......就搞到好多人趕唔切返屋企......好在我住係離島區既愉景灣.....所有住愉景灣既人都返到屋企...

1:30pm

打比Cato: 喂!! 天文台話3點半前會打八號風球...咁你返來未丫..

Cato : 等我問問 HR先?

2:30 pm

八號風球~~~打極公司電話都無人接...我諗Cato走左.....

終於 2:45pm打返來~~~我2:15pm到碼頭.......勁多人......打唔到電話...緊係啦!而家八號風球啦!!!HR打幾隻字打成粒鐘? 比我做HR...我5分鐘打好send出去就閃人啦!老公話好多人，唔知幾點返到....我就話我去碼頭等你，因為我要去百佳買野。

_______________________________________________________

我去到百佳，真係勁多人，我打算整芝士蛋糕.....無芝士....基本上咩都無...連Nobita食既雞肉都無......好在屋企有薯仔......之後都唔知買咩好...咁就有咩買咩啦!!

哇哈哈~~節瓜、茄子、溫室蕃茄 (無晒平蕃茄)、薯仔 (明知屋企有仲買)、雞蛋 (屋企係仲有好多隻又買)、牛油 (屋企都係有足夠整兩次muffin)、果汁(2盒多d分)、牛奶、零食.......等

3:30 pm 老公打比我，佢話到左碼頭啦!!!我就叫佢....你快d入來百佳搵我啦!好多人排隊比錢...我排係零食個行我失控一邊行一邊選零食丫.......哈..

______________________________________________________

我先來介紹一下我最鐘意既蕃薯片...老公唔會同我爭食 (佢話太甜)....但係多左款南瓜味...唔知好唔好味呢? 個支茄汁係Nobita 放係度.....我影相佢又走埋來攪攪震。

________________________________________________________________

咩都有d，都唔知煮咩好.......好啦就煮蕃茄薯仔湯+凍豆腐啦 !(個凍豆腐我見得返三盒我又買一盒)

唔知你地有無食過呢? 來過我屋企打邊爐一定有食過．．．．因為我真係好鐘意食.......我平時都會加入湯煮來食。我煮日本野食既 "關西煮" 都會加凍豆 。

_________________________________________________________________

切薯仔個時諗起......朋友既媽媽煮過既薯仔好好味....你地都可以試下好好味!

就係放油煎下d薯條先......跟住就放鹽糖...再加小小醋.....咁就得啦! 真係好好味

_______________________________________________________________

跟住就係戲肉...... "朱古力雞翼 " ....係我細個時去表妹屋企開party舅母整話呢個叫朱古力雞翼....咁食過既朋友都會話幾特別個味用咩整? 我一話係朱古力雞翼，所有人都會問...朱古力可以煮野食 ?

Cato: 似咖啡味多d.....

咁其實~~~佢個味咁特別係用左呢支酒煮..... 呢支係咖啡甜酒.....Cato無講錯係咖啡味.....但係我細細個舅母話呢個叫 "朱古力雞翼" 丫嗎? 咁就係朱古力味啦!


__________________________________________________

總結 : 買左咁多野, 但係煮得小小野....而家成雪櫃都係食物。

仲有朱古力雞翼 ， Cato先生係一隻都無食到...只係食d汁......(唔比面....其實唔係我早就知佢唔食雞翼...因為有骨丫嗎.....仲好我一個食晒...正...) 我可以一次食廿隻雞翼...我至愛。